இந்துஸ்தான் போட்டோ ஃபிலிம்ஸ்

இந்துஸ்தான் புகைப்பட நிறுவனம்

வகை	பொதுத்துறை நிறுவனம்
நிறுவுகை	1960
தலைமையகம்	உதகமண்டலம், தமிழ் நாடு
தொழில்துறை	ஒளிப்படவியல்
உற்பத்திகள்	படல மறை, புகைப்பட தாள், வேதிப்பொருள்
இணையத்தளம்	http://hpf-india.com/

இந்துஸ்தான் போட்டோ பிலிம்ஸ் , நீலகிரி மாவட்டத்திலுள்ள ஒரே பொதுத் துறை நிறுவனமும், தெற்காசியாவில் அமைக்கப்பட்ட ஒரே பிலிம் தொழிற்சாலையுமாகும் .

துவக்கம் மற்றும் செயல்பாடு

1960ம் ஆண்டு உதகையில் உதயமான இந்நிறுவனம் 1967ம் ஆண்டு, அப்போதைய பிரதமர் இந்திரா காந்தியால் தொழிற்சாலையின் முதல் உற்பத்தி துவங்கிவைக்கப்பட்டது. இதில், 5000 தொழிலாளர்கள் நேரடியாகவும், 1 லட்சம் பேர் மறைமுகமாகவும் பயனடைந்து வந்தனர். ஆலையை விரிவுப்படுத்த எண்ணிய ஒன்றிய அரசு 500 கோடி ரூபாயில் புதிய எக்சு-கதிர் தொழிற்சாலையை, உதகை இந்து நகர் பகுதியில் அமைத்து, மேலும் பல தொழிலாளர்களுக்கு வேலை வாய்ப்பை கொடுத்தது.

புதிய பொருளாதாரக் கொள்கையின் தாக்கம்

1991ம் ஆண்டு புதிய பொருளாதாரக் கொள்கையால் அன்னிய முதலீட்டார்களும், தனியார் பிலிம் நிறுவனங்களும் இந்தியச் சந்தையில் காலடி எடுத்து வைத்ததால், ஆலை நலிவுற்றது. இத் தொழிற்சாலை 1995-இல் பெரும் நிதி நெருக்கடியைச் சந்தித்ததால், 1996-ஆம் ஆண்டு தொழிற்சாலைகளின் மறுசீரமைப்பு வாரியத்தின் கட்டுப்பாட்டில் ஒப்படைக்கப்பட்டது. ஆலையில் பணிபுரிந்து வந்த 5400 தொழிலாளர்களை படிப்படி யாக குறைக்க ஒன்றிய அரசு நடவடிக்கை எடுத்தது. அதன் விளைவாக 2014 ஆம் ஆண்டில் , 660 தொழிலாளர்கள் மட்டுமே பணிபுரிந்து வந்தனர் .

ஆலையின் வளர்ச்சி

உதகைமண்டலத்தின் இந்து நகரில் 500 கோடிகள் செலவில் புதிய எக்ஸ்-ரே தொழிற்சாலையை விரிவுபடுத்தியது. இதன்மூலம் உதகை தொழிற்சாலையின் வளர்ச்சிக்கு உதவ முடியும் என்று ஒன்றிய அரசு நினைத்தது.

தொழிற்சாலை மூடல்

2013 ஆம் ஆண்டு ஜூன் மாதத்தில் நடைபெற்ற பொதுத் துறை நிறுவனங்களுக்கான மறுசீரமைப்பு வாரியக் கூட்டத்தில், இந்த ஆலையில் பணியாற்றும் அனைத்து ஊழியர்களுக்கும் விருப்ப ஓய்வு வழங்கவும், அதற்காக 2007-ஆம் ஆண்டின் ஊதிய மறுசீரமைப்பின்படி இத் தொகை வழங்கப்படுமெனவும், இதற்கான இறுதி அறிவிப்பை நீதிமன்றம் வெளியிடும் எனவும் தெரிவிக்கப்பட்டது .விருப்பு ஓய்வு திட்டத்துக்கு நிதி 2014 ஆம் ஆண்டு பட்ஜெட்டில் ஒதுக்கப்பட்டுள்ளதால், ஆலை மூடப்படுவது உறுதியாகியுள்ளது.