வீரமாலை

வீரமாலை என்னும் நூலைப் புதுக்கோட்டை மாவட்டம் ராங்கியம் என்னும் ஊரிலுள்ள கோயில் கல்வெட்டு குறிப்பிடுகிறது. இந்த நூலை இயற்றியவர் பாண்டி கவிராயர். இந்த நூலைப் பாடியதற்காக நாயக்க மன்னரின் ஆட்சி அலுவலர் தீத்தாரியப்பப்பிள்ளை என்பவரும், இராசிமங்கலம் என்னும் ஊர் மக்களும் புலவர் பாண்டி கவிராயருக்கு நிலம் வழங்கிச் சிறப்பித்தனர் என்று கல்வெட்டு குறிப்பிடுகிறது.

வீரவெட்சிமாலை என்னும் சிற்றிலக்கிய வகையாக இது இருக்கலாம். வீரப்பிரதாபர் என்னும் பெயர் பெற்ற கிருஷ்ணதேவராயன் அல்லது புலவர் காலத்து அரசன் கிருஷ்ணதேவராயனின் தம்பி அச்சுத தேவ ராயன் வெற்றிகளைக் கூறுவதாக இந்த நூல் அமைந்திருக்கலாம்.

இது வீரவெண்பாமாலை என்னும் நூல் போல் மன்னனைப் போற்றி எழுதப்பட்ட நூல்.

ராங்கியம் ஆவணம்

"ரௌத்திரி வருடம் தை மாதம் 30 ஆம் தேதி ஸ்ரீமத் வெங்காள நாய்க்கரய்யன் காரியத்துக்குக் கர்த்தரான தீத்தாரியப்பரும் இராசிமங்கலம் ஊரவரும் புலவர் பாண்டி கவிராசர் வீரமாலை பாடுகையில் இவர்க்கு இறையிலியாக விட்ட நிலம் சந்திராதித்த வரைக்கும் பற்றி அனுபவிக்கக் கடவராகவும்"