இளங் கீரனார்

இளங்கீரனார் சங்ககாலப் புலவர்களில் ஒருவர். இவரது 18 பாடல்கள் சங்கநூல் தொகுப்பில் இடம்பெற்றுள்ளன. அகநானூறு 3, 225, 239, 289, 299, 361, 371, 395, 399, குறுந்தொகை 116, நற்றிணை 3, 62, 113, 269, 308, 346 எண் கொண்ட பாடல்களாக அவை அமைந்துள்ளன. அனைத்தும் அகப்பொருள் பாடல்கள். இவற்றுள் குறுந்தொகைப் பாடல் ஒன்று மட்டும் குறிஞ்சித்திணைப் பாடல். ஏனையவை பாலைத்திணைப் பாடல்கள்.

பொறையன், திதியன், சோழர் ஆகியோரைப் பற்றி இவர் தமது பாடல்களில் குறிப்பிட்டுள்ளார்.

பாடல்களில் காணப்படும் குறிப்பிடத்தக்க செய்தி

• சோழரின் உறந்தைப் பெருந்துறை அறல் என்னும் ஆற்றுமணல்-படிவு போல கூந்தலை உடையவளாம் தலைவன் விரும்பும் காதலி.
• மரையா என்னும் காட்டுமான்-ஆட்டை அடித்துப் புலி உண்ட மிச்சத்தை எருவைக் கழுகு தன் பெண்கழுகுக்கு கொண்டு வந்து தரும் காட்டை நினைத்த தலைவன் மனைவியை விட்டுப் பிரியாமல் நின்றுவிடுகிறானாம்.
• உதியன் போரிட்ட களத்தில் இயவர் குழல் ஊதினர்.
• பொறையன் கொல்லிமலை அரசன்.

உவமை நலம்

• ஓமை மரத்துச் செதிள் முதலை உடம்பு போல் இருக்கும்.
• காற்றில் தேக்கிலை பறப்பது பருந்து பறப்பது போல இருக்கும்.
• தாமரையோடு குவளை பூத்திருப்பது போல அவள் முகத்தில் கண் பூத்திருக்கும்.
• குவளை மழையில் நனைவது போல அழுதாள்.

இசை

• மூங்கிலில் வண்டு துளைத்த துளை வழியாகக் காற்று செல்லும்போது ஆயர் ஊதும் குழல் போல் ஓசை கேட்குமாம்.
• காற்றில் அசையும் புதர் மூங்கில் ஒலி யானை பிளிறுவது போல இசை எழுப்பும்.
• ஆம்பல் அம் தீங்குழல் இயவர் ஊதும் இசை.

வாழ்வியல்

திரிமருப்பு இரலை - அகம் 371

நெல்லிவட்டு

• நெல்லிவட்டு - சிறுவர் நெல்லிக்காயை வட்டாக (கோலிக்குண்டாக) வைத்துக்கொண்டு விளையாடினர்.
• இரலை மானின் கொம்பு திரிந்து இருக்கும்.
• மரைமான் நெல்லிக்கனிகளை விரும்பி மேயும்
• அம்பு நுனியில் தீப்பந்தம் வைத்து எய்தனர்.
• மகளிர் மாலையில் பிறை தொழுவர்.
• பல்லியை வாழ்த்தினர்.
• மகளிர் நெற்றியில் திலகம் வைத்துக்கொள்வர்.
• மகளிர் மார்பில் தொங்கும் துணியில் குழந்தைகளைச் சுமந்து செல்வர்.
• பாவை என்னும் பொம்மலாட்டம்.

சொல்லாட்சி

இவரது பாடல்களில் அரிய பல பழமையான சொல்லாட்சிகள் காணப்படுகின்றன. இதனாலும், உதியன் அரசனைக் குறிப்பிடுவதாலும் இவர் காலத்தால் முந்திய புலவர்களில் ஒருவர் எனத் தெரியவருகிறது.